बावड्यात अश्विन पौर्णिमेनिमित्त भव्य धम्मजागृती मेळावा उत्साहात

धम्म रॅलीतून समता आणि बंधुतेचा संदेश; गुणवंत विद्यार्थी व कर्तृत्ववान व्यक्तींचा सन्मान, भंत्ते अंगुलीमाल यांची धम्मदेशना

बावडा, ता. इंदापूर, जि. पुणे | प्रतिनिधी

बावडा येथे अश्विन पौर्णिमेनिमित्त भव्य धम्मजागृती मेळावा उत्साहात पार पडला. भारतीय बौद्ध महासभा आणि समस्त नवबौद्ध समाज, बावडा यांच्या संयुक्त विद्यमाने सोमवारी, २६ ऑक्टोबर रोजी या कार्यक्रमाचे आयोजन करण्यात आले होते. भगवान गौतम बुद्ध आणि डॉ. बाबासाहेब आंबेडकर यांच्या विचारांचा जागर या मेळाव्यात करण्यात आला.

कार्यक्रमाची सुरुवात भगवान गौतम बुद्ध आणि डॉ. बाबासाहेब आंबेडकर यांच्या प्रतिमांना पुष्पहार अर्पण करून झाली. त्यानंतर धम्म रॅली काढण्यात आली. या रॅलीतून समता, बंधुता, करुणा आणि सामाजिक एकतेचा संदेश देण्यात आला.

गुणवंत विद्यार्थी आणि कर्तृत्ववान व्यक्तींचा सन्मान

अश्विन पौर्णिमेचे औचित्य साधून विविध स्पर्धा परीक्षांमध्ये यश मिळवलेल्या विद्यार्थ्यांचा गौरव करण्यात आला. यामध्ये अमर विलास कवडे-देशमुख, समीर इब्राहिम मुखेरी, डॉ. अनन्या राहुल मखरे, प्रा. समता समीर मखरे, माधुरी संतोष सावंत, सुप्रिया अखिल कांबळे, स्वाती किशोर कांबळे, दिव्या जितेंद्र रणपिसे, ऐश्वर्या कांबळे आणि राजरत्न भिमराव कांबळे यांच्यासह गुणवंतांचा समावेश होता.

विविध क्षेत्रांत उल्लेखनीय कामगिरी करणाऱ्या महिला आणि पुरुषांचाही सन्मान करण्यात आला. विद्यार्थ्यांच्या यशाचे कौतुक करून त्यांच्या शैक्षणिक प्रगतीला प्रोत्साहन देण्यात आले.

बुद्ध आणि धम्माच्या विचारांवर मार्गदर्शन

या मेळाव्याच्या अध्यक्षस्थानी नंदूकुमार केंगार होते. अविनाश काले (ॲडव्होकेट), सोमनाथ भोसले, पल्लवी गिरमे (सरपंच), शिवाजीराव मखरे (आरपीआय अध्यक्ष) आणि शकुंतला मखरे यांच्यासह विविध क्षेत्रांतील मान्यवर उपस्थित होते.

प्रमुख वक्त्यांनी भगवान बुद्ध आणि त्यांचा धम्म तसेच बौद्ध धम्मातील अश्विन पौर्णिमेचे महत्त्व या विषयांवर मनोगते व्यक्त केली. समाजात शिक्षणाचा प्रसार, वैचारिक जागृती, सामाजिक समता आणि बंधुभाव वाढविण्यासाठी अशा कार्यक्रमांचे सातत्याने आयोजन करण्याचे आवाहन करण्यात आले.

यानंतर पूज्य भंत्ते अंगुलीमाल यांनी उपस्थितांना धम्मदेशना दिली. भगवान बुद्धांच्या विचारांचा जीवनात अंगीकार करण्याचे महत्त्व त्यांनी स्पष्ट केले. करुणा, मैत्री, प्रज्ञा आणि समता ही मूल्ये जपण्याचा संदेश त्यांनी दिला.

आयोजनासाठी पदाधिकाऱ्यांचे परिश्रम

या धम्मजागृती मेळाव्याला महिला, उपासक आणि उपासिका मोठ्या संख्येने उपस्थित होते. धार्मिक, सामाजिक आणि शैक्षणिक प्रबोधनाचा संगम या कार्यक्रमातून घडून आला.

यावेळी शकुंतला मखरे, समिरन पोळ, नितीन भोसले आणि विलास मखरे यांच्यासह अनेक मान्यवर उपस्थित होते.

कार्यक्रम यशस्वी करण्यासाठी भारतीय बौद्ध महासभेचे पदाधिकारी अनिल कांबळे, विशाल कांबळे, जिग्नेश कांबळे, राजरत्न कांबळे, अशोक कांबळे, आजिनाथ कांबळे, महादेव कांबळे, गणेश कांबळे, संजय लोंढे आणि बापू सोनवणे यांनी विशेष परिश्रम घेतले. कार्यक्रमाला उपस्थित उपासक आणि उपासिकांसाठी भोजनाची व्यवस्थाही करण्यात आली होती.

About the Author

Pravin Jamnik

Administrator

View All Posts