उमरखेडमध्ये ७० वा धम्मचक्र प्रवर्तन दिन उत्साहात साजरा

डीजेमुक्त ढोल-ताशांच्या मिरवणुकीत हजारोंचा सहभाग; बुद्ध, धम्म आणि सामाजिक एकतेचा संदेश

उमरखेड, जि. यवतमाळ, दि. २० ऑक्टोबर २०२६ : यवतमाळ जिल्ह्यातील उमरखेड शहराच्या डॉ. बाबासाहेब आंबेडकर वार्डात ७० वा धम्मचक्र प्रवर्तन दिन उत्साहात साजरा करण्यात आला. या निमित्ताने आयोजित भव्य मिरवणुकीत हजारो बौद्ध बांधव आणि नागरिक सहभागी झाले. पारंपरिक ढोल-ताशांचा गजर आणि ‘जय भीम’, ‘नमो बुद्धाय’च्या जयघोषाने परिसर धम्ममय झाला होता.

उत्सवाची सुरुवात सकाळी १० वाजता तथागत गौतम बुद्ध, डॉ. बाबासाहेब आंबेडकर आणि सम्राट अशोक यांच्या प्रतिमांना पुष्पहार अर्पण करून करण्यात आली. भंते कीर्ती बोधी, माजी सैनिक शंकरराव दिवेकर, माजी नगरसेविका हिराबाई दिवेकर आणि रमामाता महिला मंडळाच्या अध्यक्षा उषाताई इंगोले यांच्या हस्ते पंचशील ध्वजाचे ध्वजारोहण करण्यात आले. यावेळी महिलांनी पंचशील ध्वजगीत सादर केले. उपस्थितांनी सामूहिक त्रिशरण व पंचशील ग्रहण केले.

सायंकाळी ६ वाजता डीजेमुक्त ढोल-ताशांच्या गजरात भव्य मिरवणूक काढण्यात आली. मिरवणुकीदरम्यान डॉ. बाबासाहेब आंबेडकर यांच्या पुतळ्याला पुष्पहार अर्पण करून नागरिकांनी अभिवादन केले. शिस्तबद्ध पद्धतीने पार पडलेल्या या मिरवणुकीतून समता, बंधुता आणि सामाजिक एकतेचा संदेश देण्यात आला.

उत्सवाच्या आयोजनासाठी समितीने अवघ्या आठ दिवसांत तयारी केली होती. समितीचे अध्यक्ष पत्रकार सिद्धार्थ दिवेकर, उपाध्यक्ष कुमार केंद्रेकर, सचिव आकाश श्रवले, कोषाध्यक्ष संतोष इंगोले, कार्याध्यक्ष शुद्धोधन दिवेकर व तुषार पाईकराव, तसेच संघटक अजय दिवेकर आणि अंकुश दिवेकर यांनी परिश्रम घेतले. उत्सव शांततेत पार पडण्यासाठी उमरखेड पोलिस ठाण्याच्या वतीने चोख बंदोबस्त ठेवण्यात आला होता.

या उत्सवातून भगवान बुद्धांचा शांतीचा संदेश आणि डॉ. बाबासाहेब आंबेडकरांचे समता व बंधुतेचे विचार जनमानसात रुजविण्याचा प्रयत्न करण्यात आला.

About the Author

Pravin Jamnik

Administrator

Visit Website View All Posts